သင့်အတွက် ဘုရားသခင်၏လက်ဆောင် (ဖေဖော်ဝါရီ ၁၆)
“ပေတရုကလည်း ‘သင်တို့သည် နောင်တရကြလော့။ အပြစ်လွှတ်စေခြင်းငှာ ယေရှုခရစ်၏နာမ၌ ဗတ္တိဇံကို တစ်ယောက်မကျန် ခံယူကြလော့။ သို့ပြုလျှင် သန့်ရှင်းသောဝိညာဉ်တော်တည်းဟူသော ဆုကျေးဇူးကို ခံရကြလိမ့်မည်’ ဟု ဆို၏။” (တမန်တော်ဝတ္ထု ၂:၃၈)
ခရစ်တော်သည် ကိုယ်တော်၏အသင်းတော်အား သန့်ရှင်းသောဝိညာဉ်တော်၏ ဆုကျေးဇူးကို ပေးမည်ဟု ကတိပြုထားပါသည်။ ထိုကတိတော်သည် ရှေးဦးတမန်တော်များအတွက် ဖြစ်သကဲ့သို့ ကျွန်ုပ်တို့နှင့်လည်း အမျှပင် သက်ဆိုင်ပါသည်။ (The Desire of Ages, 672)
ပင်တေကုတ္တေနေ့တွင် တမန်တော်များ ဆုတောင်းခဲ့သကဲ့သို့၊ ကျွန်ုပ်တို့သည်လည်း သန့်ရှင်းသောဝိညာဉ်တော် ဆင်းသက်လာစေရန် အားကြီးသောစိတ်ဖြင့် ဆုတောင်းသင့်ပါသည်။ ထိုအချိန်ကာလ၌ သူတို့သည် ဝိညာဉ်တော်ကို လိုအပ်ခဲ့သည်ဆိုလျှင်၊ ယနေ့အချိန်တွင် ကျွန်ုပ်တို့သည် ပို၍ပင် လိုအပ်နေပါသည်။ (The Review and Herald, August 25, 1896)
ကျွန်ုပ်တို့ရရှိမည့် သန့်ရှင်းသောဝိညာဉ်တော်၏ အတိုင်းအတာသည် ကျွန်ုပ်တို့၏ တောင့်တမှု၊ အသုံးပြုသော ယုံကြည်ခြင်း နှင့် ကျွန်ုပ်တို့အား ပေးသနားမည့် အလင်းနှင့် အသိပညာကို မည်သို့အသုံးချမည် ဆိုသည့်အချက်များပေါ်တွင် မူတည်နေပါလိမ့်မည်။ (The Review and Herald, May 5, 1896)
ဘုရားသခင်၏ ကတိတော်ကို ယုံကြည်သည်ဟု ဆိုကြသူများစွာ ရှိပါသည်။ သူတို့သည် ခရစ်တော်အကြောင်းနှင့် သန့်ရှင်းသောဝိညာဉ်တော်အကြောင်းကို ပြောဆိုကြသော်လည်း မည်သည့်အကျိုးကျေးဇူးမျှ မခံစားရကြပါ။ အကြောင်းမူကား သူတို့သည် ဘုရားသခင်၏ အင်အားစုများ၏ လမ်းပြမှုကို ခံယူရန်နှင့် အုပ်စိုးမှုကို ခံယူရန် မိမိတို့၏ စိတ်ဝိညာဉ်ကို ပုံအပ်ခြင်း (Surrender) မရှိကြသောကြောင့် ဖြစ်သည်။ ကျွန်ုပ်တို့သည် သန့်ရှင်းသောဝိညာဉ်တော်ကို အသုံးချ၍ မရပါ။ ဝိညာဉ်တော်ကသာ ကျွန်ုပ်တို့ကို အသုံးပြုရမည်ဖြစ်သည်။ ဝိညာဉ်တော်အားဖြင့် ဘုရားသခင်သည် မိမိ၏လူမျိုးတို့အား “မိမိအလိုရှိသည်အတိုင်း အလိုရှိစေခြင်းငှာလည်းကောင်း၊ အကျိုးကို ပြီးစီးစေခြင်းငှာလည်းကောင်း” ပြုတော်မူ၏။ (ဖိလိပ္ပိ ၂:၁၃)။ သို့သော် လူများစွာတို့သည် ဤအချက်ကို လက်မခံလိုကြဘဲ မိမိတို့ကိုယ်ကိုသာ စီမံခန့်ခွဲလိုကြသည်။ ထို့ကြောင့် သူတို့သည် ကောင်းကင်ဆုကျေးဇူးကို မခံရခြင်းဖြစ်သည်။ ဘုရားသခင်ရှေ့၌ နှိမ့်ချစွာ စောင့်ဆိုင်းနေသူ၊ ကိုယ်တော်၏ လမ်းပြမှုနှင့် ကျေးဇူးတော်ကို မျှော်လင့်စောင့်စားနေသူများအားသာ ဝိညာဉ်တော်ကို ပေးသနားတော်မူ၏။ ဘုရားသခင်၏ တန်ခိုးတော်သည် ထိုသူတို့၏ တောင်းဆိုမှုနှင့် လက်ခံမှုကို စောင့်ကြိုနေပါသည်။ ယုံကြည်ခြင်းဖြင့် တောင်းဆိုသော ဤကတိတော်လာ ကောင်းချီးသည် အခြားသော ကောင်းချီးမင်္ဂလာအားလုံးကိုလည်း တစ်ပါတည်း ဆောင်ကြဉ်းလာပါသည်။ ၎င်းကို ခရစ်တော်၏ ကျေးဇူးတော် ကြွယ်ဝခြင်းနှင့်အညီ ပေးသနားခြင်းဖြစ်ပြီး၊ ကိုယ်တော်သည် လူတိုင်း၏ လက်ခံနိုင်စွမ်း (Capacity) အလိုက် ဖြည့်ဆည်းပေးရန် အသင့်ရှိနေပါသည်။ (The Desire of Ages, 672)
သန့်ရှင်းသောဝိညာဉ်တော်သည် နှလုံးသားထဲတွင် ကိန်းဝပ်သောအခါ၊ ထိုသူအား မိမိ၏ စရိုက်လက္ခဏာ ချို့ယွင်းချက်များကို မြင်စေပြီး၊ အခြားသူတို့၏ အားနည်းချက်များကို သနားတတ်စေကာ၊ မိမိကိုယ်တိုင် ခွင့်လွှတ်ခြင်းခံလိုသကဲ့သို့ အခြားသူများကိုလည်း ခွင့်လွှတ်တတ်စေရန် လမ်းပြပါလိမ့်မည်။ ထိုသူသည် သနားကြင်နာတတ်သူ၊ ယဉ်ကျေးသိမ်မွေ့သူနှင့် ခရစ်တော်ကဲ့သို့သောသူ ဖြစ်လာပါလိမ့်မည်။ (SDA Bible Commentary 2:1038)
သန့်ရှင်းသောဝိညာဉ်တော်သည် မေတ္တာ၊ ဝမ်းမြောက်ခြင်း၊ ငြိမ်သက်ခြင်း၊ ခွန်အားနှင့် သက်သာခြင်းတို့ကို ပေးသနားတော်မူ၏။ ၎င်းသည် ထာဝရအသက်ရှင်ခြင်းအလို့ငှာ ထွက်စမ်းသော စမ်းရေတွင်းနှင့် တူလှပါသည်။ ထိုကောင်းချီးမင်္ဂလာသည် လူတိုင်းအတွက် အခမဲ့ဖြစ်ပါသည်။ (The Signs of the Times, August 22, 1892)
#TheFaithILiveBy
