ပညတ်တော်ကို စောင့်ရှောက်ရာ၌ ယေရှု၏ စံနမူနာ
“ငါသည် ငါ့ခမည်းတော်၏ ပညတ်တို့ကို စောင့်ရှောက်၍ ခမည်းတော်၏ မေတ္တာတော်၌ တည်နေသကဲ့သို့၊ သင်တို့သည် ငါ့ပညတ်တို့ကို စောင့်ရှောက်လျှင် ငါ့မေတ္တာ၌ တည်နေကြလိမ့်မည်။” (ယောဟန် ၁၅:၁၀)
ဘုရားသခင်၏ ပညတ်တော်သည် ကိုယ်ကျင့်တရားဆိုင်ရာ စုံလင်ခြင်းအတွက် တစ်ခုတည်းသော စစ်မှန်သည့် စံနှုန်းဖြစ်သည်။ ထိုပညတ်တော်ကို ခရစ်တော်၏ အသက်တာတွင် လက်တွေ့ကျကျ စံနမူနာပြခဲ့သည်။ ကိုယ်တော်က မိမိကိုယ်တိုင်နှင့် ပတ်သက်၍ “ငါသည် ငါ့ခမည်းတော်၏ ပညတ်တို့ကို စောင့်ရှောက်ပြီ” ဟု မိန့်တော်မူခဲ့သည်။
ပညတ်တော်သည် ဘုရားသခင်၏ အတွေးတော်ကို ဖော်ပြချက်ဖြစ်သည်။ ခရစ်တော်၌ ထိုပညတ်ကို လက်ခံရရှိသောအခါ ၎င်းသည် ကျွန်ုပ်တို့၏ အတွေးဖြစ်လာသည်။ ဘုရားသခင်သည် ကျွန်ုပ်တို့ကို ပျော်ရွှင်စေလိုသောကြောင့်၊ ပညတ်တော်ကို နာခံခြင်းအားဖြင့် ဝမ်းမြောက်ခြင်းရှိစေရန် ကိုယ်တော်သည် ကျွန်ုပ်တို့အား ပညတ်တရားများကို ပေးသနားခဲ့ခြင်း ဖြစ်သည်။ ယေရှုဖွားမြင်တော်မူစဉ်က ကောင်းကင်တမန်များက—
“ထက်ကောင်းကင်၌ ဘုရားသခင်သည် ဘုန်းကြီးတော်မူစေသတည်း။ မြေကြီးပေါ်၌လည်း ငြိမ်သက်ခြင်းရှိစေသတည်း။ လူတို့အား မေတ္တာကရုဏာရှိစေသတည်း” (လုကာ ၂:၁၄)
ဟု သီဆိုခဲ့ကြခြင်းမှာ ကိုယ်တော်မြှင့်တင်ရန်နှင့် ဂုဏ်ပြုရန် ကြွလာတော်မူသော ပညတ်တော်၏ အခြေခံမူများကို ကြေညာနေခြင်း ဖြစ်ပါသည်။
ယေရှုက “ကောင်းကင်နှင့် မြေကြီး မပျက်စီးမီတိုင်အောင်၊ ပညတ်တရား၌ အငယ်ဆုံးသော အက္ခရာတစ်လုံး၊ အစက်တစ်စက်မျှ အကျိုးမဲ့မပျက်စီးရ၊ ခပ်သိမ်းသော အမှုအရာတို့သည် ပြည့်စုံရမည်” ဟု မိန့်တော်မူခဲ့သည်။ (မဿဲ ၅:၁၈)။ ကောင်းကင်၌ ထွန်းလင်းနေသော နေမင်းနှင့် သင်တို့မှီတင်းနေထိုင်ရာ ခိုင်ခံ့သော မြေကြီးတို့သည် ဘုရားသခင်၏ ပညတ်တော် ပြောင်းလဲခြင်းမရှိဘဲ ထာဝရတည်မြဲကြောင်း သက်သေများ ဖြစ်ကြသည်။ ထိုအရာများ ပျက်စီးသွားနိုင်သော်လည်း ဘုရားသခင်၏ ပညတ်တော်များမှာမူ တည်တံ့နေမည် ဖြစ်သည်။ “ပညတ်တရား၌ အစက်တစ်စက် ပျက်စီးခြင်းထက် ကောင်းကင်နှင့် မြေကြီး ပျက်စီးခြင်းသည် သာ၍လွယ်၏။” (လုကာ ၁၆:၁၇)
“ထာဝရဘုရား၏ တရားတော်သည် စုံလင်သည်” ဖြစ်သောကြောင့်၊ ထိုတရားမှ သွေဖည်သမျှသည် မကောင်းမှုသာ ဖြစ်သည်။ ဘုရားသခင်၏ ပညတ်တော်ကို မနာခံဘဲ အခြားသူများကိုလည်း ထိုသို့ပြုရန် သွန်သင်သူတို့သည် ခရစ်တော်၏ စီရင်ခြင်းကို ခံရကြသည်။ ကယ်တင်ရှင်၏ နာခံမှုရှိသော အသက်တာသည် ပညတ်တော်၏ တောင်းဆိုချက်များကို ထောက်ခံအတည်ပြုခဲ့သည်။ ၎င်းသည် လူ့ဇာတိဖြင့် ပညတ်တော်ကို စောင့်ရှောက်နိုင်ကြောင်း သက်သေပြခဲ့ပြီး နာခံခြင်းက ဖြစ်ပေါ်စေမည့် မြတ်သော စရိုက်လက္ခဏာကိုလည်း ပြသခဲ့သည်။ ကိုယ်တော်ကဲ့သို့ နာခံသူတိုင်းသည်လည်း ပညတ်တော်သည် “သန့်ရှင်း၏၊ ဖြောင့်မတ်၏၊ ကောင်းမြတ်၏” ဟု ကြေညာနေကြခြင်း ဖြစ်သည်။ (ရောမ ၇:၁၂)
ယေရှုခရစ်ကို ယုံကြည်ခြင်းအားဖြင့် လူသားသည် မိမိ၏ အစွမ်းကုန် ကြိုးစားလုပ်ဆောင်ပြီး ပညတ်တော် (၁၀) ပါးကို နာခံခြင်းဖြင့် ထာဝရဘုရား၏ လမ်းစဉ်ကို လိုက်လျှောက်ရန် ကြိုးပမ်းသောအခါ၊ နောင်တရ၍ နာခံသော ထိုသူ၏ အပြစ်ကျူးလွန်မှုများကို ဖုံးအုပ်ပေးရန်အတွက် ခရစ်တော်၏ စုံလင်ခြင်းကို ထိုသူ၏အပေါ်သို့ ပေးအပ် (Impute) တော်မူပါသည်။ #TheFaithILiveBy
